Namimitig sa pagkakatayo ang baston ng baron.
Hindi pa nagagapas ang tubó. Kumawala na sa hawla
Ng hinahon ang mabangis na silahis ng tanghaling-tapat.
Nagsasanib-pulso na ang sigaw ng batingaw
at ng kaniyang paghingal.
May mensahe ang sakada. Nahúli na raw ang mga ipinatutugis.
Kinain na ng dilim ang kaninang naghahasik-indaang silahis.
Nakikipagtunggali ang pintig ng kaniyang kásing-kásing
Sa panggabing batingting ng kampana. Naglakbay
Ang baston nang higit sa sampung metro;
Tumapak
Sa mabatong landas na itinuro ng mga dapa-dapa
Ng sakada. Naroroon sila — dalawang mala-leopardong
Pusang nagbihis ng maamong mukha upang ilihim
Ang bangis— pinapapak ang hiwa na mapagkakamalang
Sangkuwartong karne kung hindi mapapansin sa tabi nila
Ang mga pugot na dagâng maihahalintulad sa gulay
Na laging natitira sa plato ng unico hijo ng baron.
Isinako ng sakada ang tigulang— pang-sumsuman
Habang ang bibig ng musmos ay tinalian ng kapirasong
Tela saka ito isinilid sa kulungang buong araw na naghintay.
May bagong alaga na naman ang pihikang anak-mayaman.
Ganito taon-taon, kapag nagsimula nang gumapas
Ng tubó ang mga maralitang sakada ng karatig-kampo.